ASTURIAN

ASTURIANU

LA ILESIA DE LA SANTA CRUZ

“Rude” o “Rood” ye una vieya palabra medieval que quier dicir la Cruz de la Crucifixón.

La primer ilesia nesti llugar fundárala'l monarca David I, rei de los escoceses, en 1129, pero quemó nun incendiu nel 1406. Poco dempués el Lord Chambelán d'Escocia fizo una donación pa construyir otra nueva, y la nave central, la llateral sur y la torre termináronse alrodiu 1414. Esta parti de la ilesia, coles sos columnes redondes escoceses, sos arcos góticos y l'artesonáu orixinal de madera de carbayu, apaez agora, dempués d'abondos cambios, muncho más asemeyada a como fuera construyía pola primer vez.

Por causa que la ilesia nun yera ancha lo suficiente pa la congregación, el coru (parti este) construyéronlu dellos artesanos locales ente 1507 y 1546, inspiradamente dirixíos por John Coutts, Mayestru Constructor.

En 1656, como consecuencia d'una disputa ente los dos ministros de la ilesia y los sos siguidores, el Conceyu Municipal llantó una separación onde agora s'atopa'l cruceru, polo tanto formando dos desempeños, la ilesia del este y la ilesia del oeste, caúna con so propiu ministru. Esta situación siguió hasta 1935, cuando les dos congregaciones volvieron axuntase embaxu un solu preláu.

La mayor restauración fízose durante los años 1936-1940. Quitóse la paré divisoria, allargáronse los dos curtios transeptos, construyóse la bóveda d'arista sobre'l cruceru, alzáronse los pisos del presbiteriu y del coru, mentantu embaxu d'esti construyéronse les sacristíes y una sala capitular.

Ente 1965 y 1968 inda hubo más restauraciones, qu'afectaron a l'anovación de la tracería pétria de varies ventanes, la sostitución de munches piedres degradaes, el rexuntáu de tola cantería y un sistema nuevu de calefacción. En 1970 refízose'l carrillón de 6 campanes y volvió mangase na torre. Agora pueden tocase a mano o mecánicamente. Ente 1987 y 1993 hubo una anovación mayor de la ilesia por un costu de 1.250.000 llibres esterlines.

María, reina de los escoceses, acudió al cultu nesta ilesia y nella pedricó John Knox. Al fíu de María, Xaime VI d'Escocia y dende 1603 -dempués de la muerte de la reina Isabel- rei Xaime I d'Inglaterra, coronáronlu equí el 29 de xunetu de 1567, faciendo d'ésta, amás de l'abadía de Westminster, la única ilesia de Gran Bretaña inda n'usu regular onde tuvo llugar una coronación.