TE WHARE KARAKIA O TE RĪPEKA TAPU

 

Ko te “Rude”, te “Rood” rānei tētahi o ngā kupu tawhito o te reo Ingarihi e tohu ana ki te rīpeka o te rīpekatanga.

 

I whakatūria te whare karakia tuatahi ki tēnei tūranga i te tau 1129 e King David I, engari ka wera ki te ahi i te 1406.  I muri tata mai, ka whai pūtea i te Lord Chamberlain o Kotirana kia hangaia tētahi whare karakia hou, ā, ka oti te Nave, South Aisle, me te Tower i te takiwā o 1414.  Mō tēnei wāhanga o te whare, ki ōna pou porotaka Kotirana, ki ōna ānau Kōhi me te tūturu o tōna tuanui, tāraia ki te oki, ka rite tōna āhua ki te wā o tōna hanganga.

 

Nā runga i te kōpā o roto, mō te minenga, ka hangaia te wāhanga o te Choir (te taha rāwhiti) i waenga i te 1507 ki 1546 e ngā kaihanga whare o tēnei takiwā, i raro anō hoki i ngā tohutohu a John Coutts, te tohunga āki toka.

 

I te tau 1656, i muri i te tautohetohe a te tokorua minita o te whare karakia me ō rātou minenga, ka wāhia te whare ki te pakitara i te pekanga kia taki rua ngā minenga, he taha rāwhiti, he taha uru me ō rāua ake minitia.  Ka pērā tonu taua wāhinga tae atu ki te tau 1935, ā, ka hono anō taua takirua i raro i te minita kotahi.

 

Kātahi ka whakahoungia rawatia ki ngā tau o te 1936 ki te 1940.  Ka turakina te pakitara o te wāhinga rua, ka whakaroangia ngā pekanga e rua, ka whakairihia he tuanui ponapona ki runga i taua pekanga, ka hīkina ngā papa o te Choir me te Chancel, otirā ka hangaia ngā Vesteries me tētahi Session House ki raro i te tuanui o te Choir.

 

Na, ka haere tonu ēnei mahi whakatikatika i waenga i ngā tau 1965 me te 1968, arā, ka whakahoungia ngā whakairo kōhatu ki ētahi o ngā matapihi, ka kuhuna he kōhatu hou ki ngā wāhi kua tanuku, ka pania he mōta hou ki ngā toka, ka whakaurungia hoki he pāwera hou. I te tau 1970 ka waihangatia anōtia te ranga-pere, ā, ka whakairihia kia taea te whakatangi-ā-ringa, ā-mihini rānei. I waenga i ngā tau o te 1987 me te 1993 ka kaha anō te whakahoutanga o te whare karakia, he £1,250,000 te utu.

 

Kua whakamoemiti atu a Mary, Te Kuini o Kotirana, i roto i tēnei whare karakia.  Kua kauhau hoki a John Knox i konei.  Ka karaunatia i te 29 o Hurae 1567 te tama a Mary, a James VI o Kotirana, tapaina anōtia ko James I o Ingarangi i te 1603 i muri i te matenga o Queen Elizabeth.  Na, koia anake nei te whare karakia, e kawe karakia tonu ana, i Ingarangi katoa, atu i te Westminster Abbey i Rānana, kua whakahaere Koroneihana.